ಕೌಜಲಗಿ:ಮನ್ನಿಕೇರಿ ತೋಟದ ಗುಡಿಸಿಲಿಗೆ ಆಕಸ್ಮಿಕ ಬೆಂಕಿ: ಹಸುಗಳು ಭಸ್ಮ
ಮನ್ನಿಕೇರಿ ತೋಟದ ಗುಡಿಸಿಲಿಗೆ ಆಕಸ್ಮಿಕ ಬೆಂಕಿ: ಹಸುಗಳು ಭಸ್ಮ
ನಮ್ಮ ಬೆಳಗಾವಿ ಸುದ್ದಿ , ಕೌಜಲಗಿ ಏ 10:
ಸಮೀಪದ ಮನ್ನಿಕೇರಿ ಗ್ರಾಮದ ತೋಟ ಒಂದರಲ್ಲಿ ವಾಸವಾಗಿದ್ದ ರೈತನ ಗುಡಿಸಲಿಗೆ ಆಕಸ್ಮಿಕ ಬೆಂಕಿ ತಗುಲಿ ಪ್ರಾಣಹಾನಿ ಉಂಟಾದ ಧಾರುಣ ಘಟನೆ ಮಂಗಳವಾರ ಸಾಯಂಕಾಲ ಜರುಗಿದೆ.
ಮನ್ನಿಕೇರಿ ಗ್ರಾಮದ ನಿವಾಸಿ ಕರವೀರಪ್ಪ ಬಸಪ್ಪ ಹುಣಶ್ಯಾಳ ಇವರ ಜಮೀನು ರಿ.ಸ.ನಂ.192/3 ರಲ್ಲಿ ಮಂಗಳವಾರ ಎ-9 ರಂದು ಸಾಯಂಕಾಲ 4 ಗಂಟೆ ಸುಮಾರಿಗೆ ಅವರು ವಾಸಿಸಿರುವ ಗುಡಿಸಲಿಗೆ ಆಕಸ್ಮಿಕ ಬೆಂಕಿ ತಗುಲಿತು. ಬೆಂಕಿ ಅನಾಹುತ ತಡೆಯಲು ರೈತರಿಂದ ಸಾಧ್ಯವಾಗದೇ ಇರುವುದರಿಂದ ಒಂದು ಎಮ್ಮೆ, ಒಂದು ಆಕಳು, ಒಂದು ಆಕಳ ಕರು, ಗುಡಿಸಲಿನಲ್ಲಿರುವ ದವಸಧಾನ್ಯಗಳು ಹಾಗೂ ಗೃಹೋಪಯೋಗಿ ವಸ್ತುಗಳು ಸುಟ್ಟು ಅವಶೇಷಗಳು ಉಳಿಯದಂತೆ ಭಸ್ಮವಾಗಿವೆ. ಘಟನೆ ನಡೆದ ಸ್ಥಳಕ್ಕೆ ತುರ್ತಾಗಿ ಕೌಜಲಗಿ-ಮನ್ನಿಕೇರಿ ವ್ಯಾಪ್ತಿಯ ಗ್ರಾಮಲೆಕ್ಕಿಗ ಎಸ್.ಎಂ.ದೇಶಪಾಂಡೆ ಹಾಗೂ ಕೌಜಲಗಿ ಕಂದಾಯ ನಿರೀಕ್ಷಕ ಹಿರೇಮಠ ಭೇಟಿ ನೀಡಿ ತನಿಖೆ ನಡೆಸಿ ವರದಿಯನ್ನು ಮೇಲಾಧಿಕಾರಿಗಳಿಗೆ ತಿಳಿಸಿದ್ದಾರೆ. ಆದರೆ ಎಲ್ಲವನ್ನು ಕಳೆದುಕೊಂಡ ಬಡ ರೈತ ಕರವೀರಪ್ಪ ಕಂಗಾಲಾಗಿ ದುಃಖದ ಮಡುವಿನಲ್ಲಿದ್ದಾನೆ. ವಾಸಿಸಲು ಈಗ ಮನೆಯೂ ಇಲ್ಲದೆ ಬೀದಿಗೆ ಬರುವಂತಾಗಿದೆ. ಸರಕಾರ ಬೇಗ ರೈತ ಕುಟುಂಬಕ್ಕೆ ಪರಿಹಾರ ನೀಡಬೇಕೆಂದು ಸುತ್ತಮುತ್ತಲಿನ ರೈತರ ಒತ್ತಾಯವಾಗಿದೆ.